3

:: شَعرك الـْ كان يلفّني ويْنـامْ ::

   
 

التاريخ : 16/11/2014

الكاتب : خليل روكوز   عدد القراءات : 1446

 


 

شَعرك

الـْ كان يلفّني ويْنـامْ

لفِّة عْيون الطِّفِل بالأحلامْ

ومِنُّو لحالو كان يتْخَصَّل

خِصْلِة إلي مْخدِّة

وْخِصْلِة حْـرامْ

 

وْإغْفى

وْشعرِكْ يِسْهر عْليِّي

وبْغَفُوْتي يْسَبِّل عَ عينيِّي

وْأوعَى

وْلِفُّو بين إيديِّي

مِتْل الْمَلاك بْتخْت رِيْش نْعامْ

 *

ولمَّا كنِتْ إصْحَى مْنِ الْوَهْلِة

وْجدّلِكْ بالعتِم عا مَهْلي

تـَ جْدايْلك تِضْحك وْتِندَهْلي

وتْقول: خلِّصْني مْنِ الإعدام

 *

بْيِظْهر عِرِف شَعرِك رَحِ تْقِصِّيه

وْراح يندهْلي تـَ إشْفع فيه

وْما في إلو غيري ..

أنا مْرَبِّيه!

وبيني وبينو فَرَّقو الإيَّامْ

 *

وإنتي ضميرِكْ بالْعَمَى مَوصوفْ

وْمتلِك الحِلاّق

ما بِيشوفْ

وْصارْ شَعرك

متل شي خاروفْ عَمْ يِحْتِمي بِالدِّيب مِنْ لِحَّامْ

وإنتْ يـا حِـلاّق

بِدْعي عْليكْ: أللهْ يِنْقُلْ هَـمّ قَلْبي لَيْكْ

أصعب مَ تِعْمى

وْيِيْبَسُوا إيْدَيكْ

ويْصير عمرَكْ مَدْرَسِةْ أَوْهامْ

 *

كيفْ لكْ قلبْ

تِقْطَعْ أَمَلْ عمْري؟

وإنْتي..

يَاْ إمّ الأمْلس الْخَمْري

فْطَمْتي طِفِلْ

رابي عَلى غمْري

تـَ تْعَيّشيه عَ سِفْرِة الأيتام!

 *

كِيْفْ تـَ الِمْقصّ لْفَوقْ شَعرك مَرّ

طاوَعْ إبِنْ آدم

عَ فِعْل الشَّرّ

وْيا هل تُرى

مَطْرَحْ ما شَعرك هَرّ

ما انْفَلْشِت حْكايِة مْنِ الآلام؟؟

هايْدي حْكايِه مِنِ دْموعي البكِرْ

الـْ بِقْيو مِنِ عْيوني

بِشَعْرِك ذِكِرْ

وْهَوْدي نِقَطْ مِن شَمْع قِدْسِ الفكِرْ

هَودي..

ألِفْ قاموس إسْتِفهامْ

 *

بَعْدو معي مَنْديلِك الأصلي

بْكَرّمُو

وِبْعامْلو بْأَصلي

وْتـَ يْضلّ يبْكيلِك، وْيِرْقِصْلي

مِن شِعرك الـْ بيحِنّ عَ وَصْلِة

إنْ كــانْ عِنْدِك بَعْد شيْ خِصْلِة

ابْعتيها اليَوم

ذِكِر لِلْمَنْديل..

حتَّـى يْشَبِّع جَوْعْتو

وِيْنـــامْ.

***

 

تابعوا قراءة بقية الحكاية في موقع جماليا

 

 

 
   
 

التعليقات : 0

 

   
 

.