حبس قزاز - شعر

حبس قزاز

عمر تنن

مطرح ما كنتي واقفة هالنّاح

مْرقْت وعنِد ما العطر منك فاح

قد المسافة الواقفة فيها

حسّيت قلبي من محَلـُّو انزاح

مَرّرت نظرة صوبِك صغيرة

وحسّيت عندي أسئلة كتيري

ركّزت فيكي شوي تا وقْفو

بالدّور عا شبّاك تفكيري

ولما نَفَد أوّلهن عليكي

دغري من عيوني ركض ليكي

لكن رجع مكسوف لمّا عْليه

جاوَبَو صابيع إيديكي

ولمّا رجع ومقصقص جناحو

رْفاقو عليه عيونهن شاحو

وكيف بالجّية إجو بالدّور

بالدّور لمّو بعضن وراحو

راحو وأنا بقيت بشكل هادي

طلّع عَ محبس حبّ متمادي

عا إصبعك لفّ بشكل مرتاح

لكن عَ عنقي شادد زيادة

ولما قشعني هيك ناداني

وقلي لحتى ما بقى تْعاني

في شبّ عاهالبنت هيدي حاز

وعَمّرت إلْهُن حبس روحاني

وهلق إنت من دون إستفزاز

اْنْساها إذا بتريد ونْساني

أحسن ما تبقى بْإنفرادي قْزاز

محبوس عم بتشوفها من  بعيد

tanan8@hotmail.com